غريبة أوى لما الواحد يبقى محوش كلام كتير وبعدين لسانه يتلجم أو يلاقى نفسه بيقول كلام تانى خالص أو يلتهم عجينة الشو الغرقانه شوكولاته -وبيقولوا عليها بروفيترول- أو يقول تعليق عبيط زى "هاخد الملبسه اللبنى عشان لايقه على لبسى" أو ينبهر بطبق سلطة الكول سلو ويصوره ويحاول بعدها يخمن.. لما الورده طماطمايه ورق الشجر ايه؟ 
صعب عليا.. وقفته ف الشمس متعبه وقلت لازم أجيبه وأسميه مجهد
مع إننا دخلنا ف عز الصيف ربط كوفيته ف شياكه ونسى الكاب على راسه والجوانتيات ف ايديه.. حسيته جبران
ماعرفش ايه حكاية اللبلاب معايا؟ كل مامسك ورقه تتملا لبلاب أخضر وحتى يوم ماحطيت ورده طلعت مكلكعه وراميه ضل ع الصفحة
ف دقايق قليله
عملوا كذا مشهد
بس صدقتهم أوى
لأ.. ماكانوش تمثيل
هناك 17 تعليقًا:
بجد يا هبة بتعجبنى تلقائيتك ونظرتك التاملية للمشاهد العادية اللى بتمر بينا فى الحياة او الأشياء الجماد اللى بتديها بكلامك صوت وحركة
بجد بوست رائع
هوبه انا بحب اوى خربشه ايدك على الورق
ولعبها ع الكيبورد
وبحبها اكتر لما بتروح عمله زوووووووم ان وتطلع لنا صور تحفه
بحبها لما بتلمس قلبى بكلامها رغم انه بيكون كلام بسيط ومش مكلكع ورغم انها ممكن تكون بتعبر عن لحظه هى عاشتها او حاجه هى حبتها
الا انى بحس انها بتلمسنى بطريقه او باخرى
وبيعجبنى تعليقاتك عن حاجات مبكنش شايقها وخصوصا تعليقاتك على الصور
هوبه شكرا انك هبه الى بعتبرها اهم صديقه لى فى عالم التدوين
هههههههههههههه هو انتى كنتى عندى
القلوب عند بعضها
أيمن!
ساعات الواحد بيفضل يسكت ويتأمل الدنيا من حواليه.. بيبقى مجرد إجهاد م المشاوير والكلام الكتير
#####
محمود!
:)
أول مرة تحصل معايا هنا.. أبقى لسه سايبه تعليق وترد أو تبقى بتكتب ف تعليق هنا.. محصلتش من أيام ماسبت مدونة الياهو.. ده أنا اللى باشكرك ع الكلام الحلو ده.. هاعيط كده.. وأنا على شعره أساساً اليومين دول
يافيونكاتك المعقودة
ايه السلاسة اللي انتي فيها دي
طب ممكن اخد الملبساية الاورنج؟!!!
بس بجد صورك جميلة اوي وعدستك تحفة وتعليقاتك تهوس
عارفة كنت زيك كده اقول الوردة طماطم والورقة ايه بس لما اشوف تورتاية عليها حاجة غريبة برضو كنت اقعد اتعب تفكيري كده
انتي عسل جدا وبستمتع بمدونتك
تحياتي لخربشاتك
ربنا يوفقك يا هوبه ويحقق كل احلامك لانك زى العسل
نوره!
للأسف علبة الملبس اتنسفت سيادتك.. بس حتى لو كان لسه فيه ماكنتش هاقدر أديكى الملبسه الأورانج..أومال أنا آكل ايه لما أبقى لابسه اللون ده؟ باهرج.. أنا ماليش ف الملبس أوى على فكرة بس كل الحكاية إن ريهام صاحبتى كان نفسها فيه وهى حامل وخفت الولد يطلعله ملبسه على قورته ولا حاجه.. مش منظر.. فجبتلها وكلت منه..آل على رأى المثل: يازايرين بيه وانتو تشتهوه..اقعدوا ف بيتكوا وكلوه
#####
غير معرف- نفسى أعرف ليه!- ربنا يتقبل منك.. باحب أنا أوى دعوات يوم الجمعه دى :) أما بقى موضوع العسل ده فكل الناس بتقول كده.. عسل أسود طبعاً
لأ بجد بشكر الصدفه اللى جابتنى المدونه التحفه دى
تحياتى
أنا كمان باشكرها.. نورت يا موجه يا زرقا- دى غنوه لعلى الحجار بالمناسبة
ده حالك
انا عارفة اد اية الاحساس دة صعب
مررت بشبيهه منذ فترة قصيرة
على اثرها كتبت اعترافات
عجبني اللبلباب الاخضر والوردة المكلكعة
اشكرك على زيارتك وتعليقك
اما عن تقييمي لفيلم ليلية البيبي دول او كبارية فهم ذو افكار جيدة الا انهم كانوا سطحيين بعض الشئ في عرض الفكرة وهذا لا يمنع وجود مجهود هايل في الانتاج والاخراج والتمثيل والتصوير والحوار والموسيقي
سمراء
لا متقوليش كبل عصافير
دموعي والله نزلت اصل افتكرت
الجوز بتاعي اللي ربنا مش راضي يمده في عمره ابدا بجد شكلمه تحفه
اما بالنسبه لمجهد بيفكرني بعالم سمسم
وورق الشجر انا بقنع نفسي ان هو جرير
بدل ما اشغل دماغي بورق الشجر هي فيها
اللي مكفيها
سمراء!
أول حد يشترك معايا ف إنه إحساس مش لطيف خالص.. لما يبقى الواحد معبى ومش عارف يطلع اللى جواه
باهديكى اللبلابه بوردتها.. صباح الورود
#####
مياده!
قلبى معاكى.. إحساس الفقد سئ
أيوه مجهد نسخة مصغرة من نمنم و فلفل سوا
وساعات يا ميدى الواحد يستبدل اللى شاغل ذهنه بحاجات عبيطة من عينة ورق الشجر ده.. بصى! ناس قالت إنه نعناع وأنا بارجح الرأى ده.. ولا أقولك لما أروح المطعم تانى هاسأل الجارسون سؤال مباشر.. بس ف الآخر الطبق تحفة لا يختلف عليها اتنين
كان فى بوست واتشال؟؟
تصوير وحوار وكلمات بتتنفس انتى ممكن تعملى فيلم كده وحينجح ان شاء الله لان حيكون فيه روح
بطوط!
دانا متراقبة بقى!
أيوه كان فيه.. بس اكتشفت إن ممكن الحدوته تتحفظ كمسوده لغاية ماخلصها أو يمكن أكور الورقه وارمى ف الباسكيت.. محتمل برضه
######
كلام وخلاص!
حلو أوى تعبير الكلمات بتتنفس.. أكيد مغسوله بأوكسى.. يعنى باحاول أضفى الروح على جمادات بماإن الناس أرواحها اتسرقت منها
مع اني مش باحب أقول كده كتعليق بس هاقوله
جميلة يا هوبا
اكتر حاجة عجبتني الملبس والعرايس الدمي "لأني كتير باقول التعليق بتاع الملبس ده!".. جميلة
ربنا يحلي أيامك
صباحك مزقزق
يامرمر انتى تقولى أى حاجه هاصدقها.. ومع إنى مش باحب أكرر كلامى.. بس هاقولها
وحشانى
إرسال تعليق