مشيت كتير لوحدىعارف أنت عامل زى ايه؟
زى معلقة عسل باخطفها جرى
وأنا نازله الشغل متأخره
بتفوقنى وتروقنى
واهو اسمى غيرت ريقى بحاجه مسكّره
بس عمرك ماهتغنينى
عن طاسة بيض
أو طبق فول
أو سندوتش فلافل
وبطاطس محمره
*****
باقعد مع نفسى كتير وبنرغى
وساعات باهاجمها واشتمها وأقولها اتلمى
بس ترجع تصعب عليا لما أشوفها بتبكى
وأقوم أحضنها وأراضيها وأفهمها إنه غصبن عنى
بس خلاص بقى! قطعتى قلبى
اللى يشوفك وأنتى سارحه ورامحه
مايشوفكيش وأنتى متكومه هنا جنبى
*****
بدل مادخل أنام ونافوخى مكركب
فيه ميت تعليق
وألف سؤال
ومليون علامة تعجب
باكتب
وقبل مالعمر من ايدى يتسرسب
واكبر
واكحكح
وانسى أشكر حد عليا طبطب
باكتب
وأحسن مابقى ف موود مهبب
واصرخ
واكسر
وف الأرض أدبدب
باكتب
ولما أعوز من كل اللى حواليا أهرب
واسرح
واعيش
ومن جنة أحلامى أقرب
باكتب
ولو خايفه وبارتعش م اللى يشّيب
وباغمض
وهاموت وأنام
من غير ماشوف كابوس مرعب
باكتب
**
أنا ليه باحب ناس ف بلاد بعيده؟
وعايشه هنا وحيده ومش سعيده؟؟
هتقولى
بسيطه..سافريلهم
يبقى ماتعرفنيش
دانا غلسه موت وعنيده
*****
ف يوم آخر بؤس وكآبه
شديت ورقه ومسكت قلم
وتخيلت إنى هادّيها كتابه
لقيتنى بارسم هِه وشابكه فيها هِه وكمان هِه وهِه
ميت هِه وف الآخر عملوا لبلابه
تقراها ممكن ضحكة سخرية
وممكن برضه تقراها تنهيدة واحده من الغلابه
*****
هو النهارده كام؟
مالِكش ف حساب الدهور؟
بس دى ذكرى يوم مشهور
كده عدى تلات شهور
من يوم ماشفت طائة نور
وقلت دا يوم جديد
محتاج دماغ حديد
وحطيت مشاعرى ف كنكه
ووقفت اتفرج عليها ف سرور
مالِك يابنتى؟؟
ماتجيبى مج وتحطى سكر وباكيت عقل
لا...أنا بس حبيت أشوفها وهى بتفور
*****
بكيت
وياريت كان البكا على حاجه تستاهل
ياريت
إنما كان على عروسه كات عندى وضاعت
وحاولت أجيب زيها مالقيت
وكان على قلم كنت أحطه زمان ع الصفحة
يقوم لوحده يرسم شجرة وشمس وبيت
وكان على شريط غناوى قديم
قعدت أسمع فيه لحد ماسف وأنا كمان مليت
وعشان كده ف قلبى حزن بايت
لدموعه ياما وياما خبيت
ماهو محدش هيفهم إنها حاجات حبيتها بجد
وعاشت جوه منى وليها وفيت
وهيتودودوا ويتكلموا وف الآخر يقرروا
"دى شوية دموع تماسيح
أو على بركة الفرحة
لجل تخزى العين
شوية زيت"
***
خلاص برج من نافوخى هيطير
أصبحت عاجزه عن النطق والتعبير
باسرح وافكر فاصدع وأنام وأقوم بدون تغيير
بس لسه ف انتظار لحظة التنوير
ويوم مالشمس تطلع ويفوح للورد عبير
واشوف عيال بتضحك وشجر عليه عصافير
هاجرى على موبايلى
مش عشان أكلمك وأقولك أسفه على التأخير
أو بحبك وباموت ف دباديبك وواحشنى كتير
لأ.. عشان أظبط الكاميرا وأديها تصوير
ماهو محدش ضامن يشوف الجمال ده تانى
ولا حد عارف بكره ممكن يشوف ولا هيبقى ضرير
***************
الحب حتى الموت
الشغل حتى الموت
الأكل حتى الموت
الضحك حتى الموت
لا منها باموت
ولا منها عايشه
أصبحت كما حتة البسكوت
على وش مج الشاى باللبن
بايشه
***
عرفت يعنى ايه بكا من غير دموع
عرفت يعنى ايه كلام مكتوم ومش مسموع
عرفت يعنى ايه وش بيضحك وقلب موجوع
عرفت يعنى ايه صوابع لناس كتيره
بتلعب بيانو
والمقطوعه هى هى
بس مرة تطلع بنوته شقيه
ومرة ذكيه
ومرة رديه
ومرة ست عجوزه بنفس مقطوع
*****
كل مدى الحالة بتتدهور
ورافضه آخد الدوا ببساطه لإنه ممرر
وأروح للحكيم ف الإستشاره ويقول: هنكرر
العلاج
بس هو ده بجد العلاج؟
ده عمره مارجعلى الإبتهاج
بالعكس باحس إن فيروس الحزن ودمى حصل مابينهم امتزاج
أنا كل اللى طالباه دلوقتى كبسولة أو معلقة أو حتى حقنة
مزاااااااااااااااااااج
********
ملحوظة: ده كلام قلته لوصف حالات على مدار العامين الماضيين.. ولكن بما إن التاريخ بيعيد نفسه فالمووودز باعيشها تانى السنة دى.. يوم حلو:) ويوم مر :( حاجه كده بنفس طعم كوكتيل Mon Cherry بتاع جهينه.. بيجمع مابين مزازة التفاح الأخضر ولذاذة الكريز الأحمر.. ايه؟ أيوه هو اللى ف الكوبايه اللى ف الصورة.. بالهنا والشفا
هناك 15 تعليقًا:
بقالى كتير مقرتش ليكى
وكنت محتاج اقرالك
بيس
هبه انا بجد زى ما بيقولوا speechless
بجد جامده جدا وحلوه اوى
عارفه بتدينى احساس بايه ؟احساسى لما بكون بقرأ لصلاح جاهين مش عارفه ليه
او بقرأ حاجه ممزجانى و مخمخانى اوى
انا يمكن مريت بكام مود من دول
بس ليه يا هبه معظمهم مود حزن
برفعلك القبعه يا هبه
و سلام مؤقت
محمود!
أنا كمان بقالى كتير ماقريتش ليك.. دخلت مرة ولقيتك حاطط يفطة ممنوع الإزعاج عشان الإمتحانات.. ربنا يوفقك ويكرمك ونشوفك دكتور سنان قد الدنيا
#####
نور!
جاهين حته واحده؟ اتقالتلى قبل كده مرتين الحقيقة ودى التالته.. أنا باحب الراجل ده وباقراله بحب ويمكن ده السبب .. معظمهم حزن ليه ليه؟ يمكن عشان لما بافرح أوى مش بالاقى لا الوقت ولا الكلام إنى أعبر عن ده.. على فكرة لسه منورة! هى اللمبه متقاده كده على طول صبح وليل؟
انا رابع واحد يحاول يفك الفيونكة بس لقيتها متضايقة وزعلانة ومش راضية تتفك اقولها يا بنتى فكى تقولى لأ قلت اسيبها زى ما هى على العموم جميل قوى الكوكتيل ده وبالذات الاجزاء الاخيرة منه عجبتنى قوى
تحياتى
ماشاء الله
كلامك حلو اوى
هو طويل
بس الواحد مش بيمل منه
تحياتى
احمد سكر
ماهى دى بقى عبقرية الفيونكه.. شيك وراقيه وحلوه بس راحت ولا جت عقدة عايزه تتفك.. بس ولا يهمك يا أيمن.. أدينى باشرب "مون شيرى" عشان أنسى
#####
خطوة عزيزة يا أحمد!
طب الحمدلله إنك مش بتمل
مساءك سكر- بس مش زياده.. أنا باحبه مظبوط
حلوة أوي الكوكتيل ده يا هبه...فيه لقطات تتوقفي عندها وتفكري فيها زي معلقة العسل إللي مش بتغني عن البطاطس المحمرة، والقلم إللي بيرسم هه :) والقهوة إللي بتتفرجي عليها ف سرور
----
هو فعلا كوكتيل مودز بس أظن إنه إللي حيغلب هو طعم الحاجات الحلوة فيه...واللا أيه؟
خالص محبتي
يااااه
جميلة جميلة يا هبة
بجد بدون مبالغات كلام يمس القلب حقيقي
رائعة
ربنا يسعدك يا هوبا ويفرحك
على فكرة أحياناً بنكون محتاجين الموووودز دي كلها
ماشاء الله عليكِ
دعوااااتك
هبه الف سلامه عليكي ياقمر
انت بس انزلي روحي المركز
كملي الكورس وانتي تبقي موووووز
البوست تحفه بجد والله بعد كل فقره كنت بقول الله ياست ولما خلصته كله افتكرت
عاشر من الناس كبار العقول
وجانب الجهال أهل الفضول
واشرب نقيع السم من عاقل
واسكب على الأرض دواء الجهول
اهو انتي بقي ياهبه اكبر كبار العقول
تحياتي
شيمو!
هو كل الكوكتيل لطيف.. بحلوه ومره! ماهو من غير المر مش هنعرف طعم الحلو
ويا صباح البونبونى
###
مرمر!
مش كده! طعم ولون وريحة كوكتيل المون شيرى بتختلف تماماً عما تشربى أو بتعبير أدق تتجرعى -لإن مش بمزاجك يعنى- عصير الكريز أو التفاح منفصلين
دعوااااااااتك أنتِ كمان
###
الله ياميدى عليكى
جبتى المفيد! ربنا يوقفلنا كبار العقول.. الجهل كارثة وبتلاقيها متجسدة ف أشخاص كتير حواليكى.. ربنا يحفظنا
مش قادرة اتخيل انه في كلمات ممكن تعبر عن احساس وهنا لقيت
مببببببببببببببدعة
جزور مصرية في ثوب عصري
شرفتني زيارتك
اشكرك على التعليق
وللاجابة علية انا انسان - فتاة عادية - فقط ولا شئ اكثر من ذلك
سمراء
أغيب أغيب وارجع الاقى البلوج جوسى جوسى! اشى عصير جهينة واشى كلام يخلي الواحد يقف ويقول لا فض فوك..فى مقاطع بعينها قريتها اكتر من مرة من كتر مالقيتها معبرة اوى وبتوصف حالات يمكن انا مريت بيها بس معرفتش اعبر عنها كدة..
بجد دا من احلى البوستات اللى قريتهالك..very inspiring
وزى ماقلتلك قبل كدة..فيكي كتير من جاهين..(كتابة وليس شكلا طبعا!!) مع لمسة فيونكاوية لذيذة!
سمراء!
انتى كمان مبدعة! البلوج بيبان من بروفايله! أنا قريت تدوينه واحده بس أكيد مش هتبقى الأخيرة
#####
ريهام!
بتوحشينى والله.. ميرسى ع التشجيع! والجهننه مؤكد سببها إنى باشرب جهينه كتير
وحشتيني أوي
روبى!
انتى كمان والله! باعتذر عن اليوم إياه! مؤكد كان باين من صوتى إنى لسه شاربه إزازه كاملة من كوكتيل الموودز.. كانت شوية كلاشات أسفرت عن إنى عاندت نفسى وقلت طب مش رايحه.. هابقى أكلمك بقى عشان كده هابدأ أرغى
إرسال تعليق