#لما حسيت إنى بيتحقق معايا وأنا من باب الذوق ومن باب إنها قعدة تعارف ماكنتش عارفه أسأل نفس كم الأسئلةالسخيفة كان نفسى أقلب الترابيزه- بعد ماشربت عصير الليمون طبعاً- وأصرخ "تاااااااااااكس"..بس ماقدرتش.. من باب الاتيكيت برضه.. ايه كل الأبواب والخنقه دى؟
#ولما عرفت إنه كان مسافر تانى يوم دبى عشان أجازته خلصت أيقنت إنه كان بس جاى على أساس فرصة ومين عارف يابنى.. وقعدت أسأل نفسى هى الأجازات بتخلص فجأه اليومين دول؟؟ هو صحيح نفسى أروح دبى.. بس تغور دبى اللى بالشكل ده
#ولما سابتنا مرات أخوه بحجة مرجحة بنتها واتلبخت أنا بعدها وحسيت إنى مش عارفه أجمع كلمتين على بعض وفضلت ساعة باتكلم أيوه بس مش كلامى عرفت إننا مش لبعض.. وندمت إنى ماقمتش أتمرجح مع البنت.. كانت عسوله أوى
#ولما سألتنى زميلتى فى مقابلة خاطفة ع السلم "هبة! انتى مرتبطة؟" ضحكت وافتكرت زكيه زكريا بسؤالها الشهير.. وقلت "لأ" مقطومه
#ولما كنا قاعدين فى أمان الله أنا وصاحبتى وإذ فجأتن جوزها قال إن واحد صاحبه جاى حسيت إن فيه مؤامرة بتحاك ليا.. عارفه إنها مؤامرة نابعة من حب بس أهى اسمها مؤامرة وخلاص.. وأنا مابرتاحش للمؤامرات أياً كانت
هناك 14 تعليقًا:
هوبه مهى دى الطريقه المعتمده
ولازم تستحملى سخافتها وغبائها زى ميت مليون واحده فى مصر والدول العربيه والمجتمعات المحافظه فى اوربا والدول المتقدمه
انا بصراحه مش متخيل شكلى وانا بشرب الليمون وودامى واحده فى حوالى ساعه لازم اسألها كام حاجه عشان اعرف فى قبول مبدئى ولا لأ؟؟
انا اكيد هفطس من الضحك انا اساسا ببقى هموت من الضحك لما بيجى حد يتقدم لاختى ويبدأ الاسطوانه المشوخه بتاعه كل عريس
وانتى بقى يا انسه معاكى ايه؟؟
وبتعملى ايه؟؟
وعايزه تشتغلى ولا لأ؟؟
واسأله كده سخفيه ربنا يصبر بر مصر كله
معااااااااااااااكي حق
انا برضو مبحبش اسلوب التدبيس ده
بنت خالتي عملتها فيا ومابكلمهاش بئالي سنة
بطوط!
عارفه إنها معتمده وعشان كده جربتها أكتر من مرة.. بس سبحان الله فى كل مرة بيطلع حاجه تخنق القعده كده.. ودى كانت شوية أمثلة
بس كله كوم ويوم عصير الليمون ده كان كوم تانى.. تطرقنا لحديث رومانسى أوى عن قضايا الخلع والطلاق.. عارف لما تحس إنك ماطلعتش م القعدة غير بالعصير! كان أحلى حاجه يومها
######
نوره!
ليه بس كده؟ هو مش تدبيس على قد ما ساعات بيبقى اهتمام.. ويمكن برضه زهق.. أنا معترفة إنى بقيت خنيقه مؤخراً
شوفى يافيونكة خضرةوباين عليكى فعلأ لسة بفيونكة ومش فاهمة الموضوع.. ماهو مدام دخلتى مرحلة الجواز يقى كدة صالون بيتكم اصبح محطة سكة حديد رسمى وقطارات العرسان لازم تقف عندكم وكل قطار يتحفك بعريس انأح من الى قبلةوانتى ما عليكى الى تشربى العصير على رأى محمودسعد وتختارى والقطار دة جاى من دبى ودةمن السعودية ودة من الكويت ودة من ميت عقبةوعلى دا الحال لحد متيجى رجلك فى قطار منهم وابقى قابلينى لو حد دفعلك التذكرةبس خليكى ذكية مش ذكية ذكريالا فاهمة يعنى اوع اخر قطار يفوتك احسن مهيبأش قدامك الا انك تشوفيلك توك توك توصلى بية
الهم بلغت الهم فاشهد.... رأفت الهجان
كلت الحلاوه يازكي
قصدي قعدتي في الصالون ياهبه
اسخف فكره بجد فكره الصالون
انا قعدتها الحمد لله وبلا فخر مرتين واعلنتها صريحه ان اللي هيعمل فيا العمل دي تاني يقصد او لا يقصد ميعرفنيش ولا يوريني وشه
لانه بجد احساس مؤذي اني زي بضاعه والاستاذ جاي يعاين ويقلب
او مثلا ان الانطباع اللي هيتاخد في القاعده دي هو اللي هتبني عليه حياتك الجايه او علي الاقل يدخلك في طريق انت عارفه اوله بس نهايه مجهوله وانا عامه بخاف من الطرق الضلمه ومبحبش الافلام المثيره وافلام المغامرات وعلي حد علمي المراهنات حرام
او مثلا ان الشخص اللي قدامي ده تفكيره
انه ممكن يختار شريكه حياه كده ده انا لما بروح اشتري
شنطه ممكن اخد فيها يومين لكن دي حياه
بس اقولك سيبك انت اهو شفتي نوع حصري
من البشر روقي ياهوبه
روّق أعصابك اوعى انت تكون مهموم
واحسب حسابك انه مافيه شيء بيدوم
أروح لمين!
أنا مش خضرة أوى برضه ولا لسه بفيونكات..وماتقلقش مش هاتجوز عمو عزيز.. بس ليه مايكونش فيه أوبشن وسط؟ يعنى لا قطر لا توك توك؟! يلا ماعلينا.. المهم أنت نورت.. وموضوع رأفت الهجان ده لخبطنى على فكرة.. أصله سيم بينى وبين واحده صاحبتى :)
####
مياده!
على فكرة بتفرحنى تعليقاتك.. وباحس ف بلوجك كمان بجو لطيف ومعسل زى البطاطا بالظبط.. كنت لسه واكلاها من يومين تلاته وافتكرتك
هى بس زهأه كده وهتروح لحالها إن شاء الله.. بس هو الواحد مايعرفش يفضفض هنا بكلمتين! أدينا بنحاول نفكها سوا
صباح الفل يا هبة.. يا سعدها يا هناها اللي هاتتجوزه!.. آه وأنا كمان ما باحبش المؤامرات والجو ده حتى لو كان عن حب.. على رأي بطوط أنا بجد هابقى هاموت من الضحك.. ويا ترى بتحبي تشربي دمعة البامية ولا تحبي شوربة المكرونة؟ ويا ترى بتعرفي تطبخي كويس أصل أنا أكييييل جامد مووووت.. ويا ترى بتحبي العنب العنب..؟؟ ارحمني يا رب ارحمني!.. تدوينة حلوة يا هوبا بنت لحظتها.. ربنا يريح بالك وبال الناس كلها
:)
اتصبحي بالخير
مرمر!
أيوه ياسعدها ياهناها.. عارفه!بعدها قعدت أضحك أنا وريهام ع الجملة دى.. شفتى فيلم حب البنات؟ ليلى علوى كانت بتروح للدكتور النفسانى جارهم- أشرف عبد الباقى- وف مرة سألها:طب لما بتحسى إنه بيستهبل بتعملى ايه؟ وعجبتنى لما ردت: أنا كمان باستهبل.. قليل من بلاهة رمزى مطلوبة يا دووووله
هوبة
وحشتني الفترة اللي انقطعت فيها عن عالم التدوين
بس بجد تدوينة حلوة معبرة مترتبة صح
انا شخصيا مبسوطة اوي ان الواحد رايق هادي البال لكن لو حصل حوار الصالون احتمال اضحك و اضحكه معايا يقوم يمشي لوحده ماهو حيحس انه عبيط بأ
نهى!
إزيك؟ أنا كمان بقيت كسلنجيه فى زياراتى للمدونات.. على قد هنا وخلاص وساعات يوحشنى حد فأروح بكليكه على اسمه أشوف عامل ايه.. المهم: لما تقعدى قعدة صالون- مش لازم ف بيتكو ونصيحة بلاش أول مرة تبقى ف البيت- هتلاقى الكلام بيجيب بعضه.. سؤال بيجرجر إجابة بيسحب تعليق يليها إبتسامة.. لو كانت صفرا هتعرفى لوحدك إنه مش ده
هو الاعتراض علي قاعدة الصالون ذات نفسها,ولا الباشمهندس اللي مجاش علي المزاج؟؟أصل الكلام اللي حضرتك بتتريقي عليه ده هو هونفس الكلام الللي بيتقال علي سور الجامعة أو في النادي في الركن البعيد الهادي ..وغالبا برضه بيبقي فيه لمون..المشكلة -من وجهة نظري طبعا -مش في الصالون ولا في النادي المشكلة في معيار الاختيار الصح....بس خلاص
متفقه معاك إن المشكلة فى معايير كل واحد.. مش ف المكان.. بدليل إنها ممكن تبقى قعدة صالون أو كافيه أو نادى ومانرتاحش لبعض.. البنى آدمين تركيبات مختلفة.. وربنا وحده اللى بيألف القلوب
بجد انتى زى العسل فكرتينى بنفسى بس مش كنت فى تحقيق كانت مهزلة لانى مش عملت بالإتكيت زيك انا سيبته وقمت عشان كدا فعلا
يسقط الصالون الف مرة
وبجد انا سعيدة بيكى واتمنى نكون اصحاب
بجد انتى زى العسل فكرتينى بنفسى بس مش كنت فى تحقيق كانت مهزلة لانى مش عملت بالإتكيت زيك انا سيبته وقمت عشان كدا فعلا
يسقط الصالون الف مرة
وبجد انا سعيدة بيكى واتمنى نكون اصحاب
إرسال تعليق