ناس بتسميه تاج بس مش عارفه ليه مش عاجبنى الاسم.. على طول بييجى ف بالى التاج اللى بيلبسه ملك وليد طاهر التخين أبوشنبات- الملك مش وليد طاهر.. الملك اللى دايماً ف رسمته المصاحبة لمقال إبراهيم عيسى ف" الدستور"- وناس بتقول عليه طربوش.. بس طربوش يعنى منشه يعنى فونوغراف يعنى باحس إنى عجزت وشعرى أبيّض وممكن أموت منكوا قبل ماكمل إجابة على كل الاسئلة.. طب ايه رأيكوا بقى إنى هاسميه بيريه.. ماهو بيريه يعنى إيمان بكرى ومن قبلها طبعاً سيدحجاب وأحمدعبدالمعطى حجازى والفنانين والرسامين والبوهيميين.. ومتهيألى إن السر ف البيريه.. فاسمحولى أسرح شويه واتخيل نفسى فنانه كبيره لابسه البيريه واستضفنى محمود سعد ف برنامجه "حلو و كداب".. وهاهى الأسئلة والأجوبة
ماذا سيحدث للميل عند وفاتى؟
بالذمه ده سؤال يتحط ف أول الحوار؟! فين معد البرنامج النبيه ده؟! ولا بلاش! الطيب أحسن
بماإن الميل وصفحتى كمان ع الياهو فأعتقد إن ف حالة وفاتى هاغيب عنكوا مدة طويلة ومش هتلاقوا ايميلات ولا بلوجات ولا كومنتات فهتعرفوا إنى مت وهتيجوا تعزوا.. ولا هتستندلوا ومش هتيجوا؟ أشك! وأدينى باكتب وصيتى من دلوقتى .. اتصدقوا عنى وادعولى ربنا يرحمنى ويغفرلى
بالذمه ده سؤال يتحط ف أول الحوار؟! فين معد البرنامج النبيه ده؟! ولا بلاش! الطيب أحسن
بماإن الميل وصفحتى كمان ع الياهو فأعتقد إن ف حالة وفاتى هاغيب عنكوا مدة طويلة ومش هتلاقوا ايميلات ولا بلوجات ولا كومنتات فهتعرفوا إنى مت وهتيجوا تعزوا.. ولا هتستندلوا ومش هتيجوا؟ أشك! وأدينى باكتب وصيتى من دلوقتى .. اتصدقوا عنى وادعولى ربنا يرحمنى ويغفرلى
هل قمت بإعطاء كلمة السر لأى شخص؟ لو نعم فما طبيعة العلاقة؟
لأ.. هاديها لحد بمناسبة ايه يعنى؟! بس لو على الصفحة فانا عملت برينتينج لإبداعاتى عشان لما أموت الورثه ينزلوها ف كتاب وأهو يطلعوا بأى حاجه.. واللى ييجى منى أحسن منى
اسمك
هبة.. هو الاسم صغنتوت ولودلعناه هيبقى أطول بس برضه باحب أسامى الدلع هوبه وهوبهوب وهيبو وبيبو وكُبه -ده اسم دلع من اختراع أخويا.. شايفين الحب ياجدعان! وأحب أهديله غنوة فريد وشاديه "ياسلام على حبى وحبك"
عمرك
بصوا! يحييكوا ويحيينا! وايييييييييييه.. دنيا! ومادايم إلا وجهه! ووحدوووووووووووه!
وبعد الموود الهباب المرتبط بالسؤال الأولانى فأحب أنوه إن ف سبتمبر الجاى-إن شاءالله- هاتم 25 سنة..ده الواحد كركب أوى ياعيال
برجك
العذراء- فيرجو يعنى- بس أنا ماليش ف موضوع الأبراج ده خالص
مجال الدراسة
اللغة الإنجليزية وآدابها من رواية وقصة قصيرة ونثر وشعرومسرح ونقد
وساعات برضه باحب أدرس شخصيات العالم اللى حواليا
وكمان لما أحب حاجه أوى باحب أذاكرها كأن –ايه كأن دى؟!- يعجبنى فيلم فاتفرج عليه ستين مرة وأدور ع السكريبت وأقراه، أو أحب كتاب فاقراه وكأنى باستعد لامتحان أو أغنية فأقعد أسمعها لحد ماللى معايا ف البيت يقولولى "يابنتى ارحمينا! انقلى على غنوه تانيه بقى!"
نوع الشخصية
بنت حلال وجدعه.. أعجبك!
السفر بالنسبة لى
أنا باعشق السفربس أونلى إف هابات ف سريرى ف الآخر.. مش بارتاح ف أى مكان وف السفريات الطويلة باخد وقت طويل على ماباخد ع المكان
وأحلى حاجه باحبها ف السفر داخل مصر إنى باقعد جنب الشباك وأسرح ف بلاد الله الواسعة ولو لوحدى باتعرف ع البنوته أو الست اللى جنبى ونقعد نرغى وكمان باحب أشوف حتت جديدة وأتعامل مع ناس عمرى ماكنت أتخيل إنى أكلمهم حتى
أما السفر للخارج فلسه شويه.. بس نفسى أول مرة أسافر تبقى فسحه ويبقى معايا صحبه حلوه
الموود الخاص بى
لو كنتم قريتوا البلوج إنترى المعنون "ويمزيكاليتى" ماكانش حد سألنى بس نقول تانى للى ثقافته فرنساوى مش إنجليزى.. أنا ويمزيكل- يعنى هوائية أو سويعاتية أو متقلبة المزاج بشكل بشع ..شايفين الجو اليومين دول عامل إزاى؟ يوم تلج ومطر ويوم حر نار.. أهو أنا كده.. وساعات باتجنن أصل أنا عندى شعره ساعه تروح وساعة تيجى
وقت الفراغ
استنوا أما أجيبلكوا الحدوته م الأول.. فبما إنى ويمزيكل هواياتى متغيرة
وانا ف الحضانه كنت أحب البلبطه ف حمام السباحة واللعب بعرايس الباربى
وانا ف ابتدائى البلبطه ف بحر مطروح والشخبطه ف كراسة الرسم بتاعة المدرسة ..ماينفعش يتقال عليه رسم
وانا ف إعدادى رسم بالفلوماستر والقلم الرصاص وأعمال فنية وكنت هادخل ف سكة النحت بس ماكملتش
وانا ف ثانوى التمشيه ف النادى وحاولت أتعلم عزف ع الأورج بس ماكملتش
وانا ف الجامعة تصوير فوتوغرافى وسفر وكتابة شعر وخواطر بالانجليزى
دلوقتى باسمع أغانى عربى وانجليزى بالهبل وباتفرج ع التليفزيون بالعبيط وباقعد ع النت كتييير وباكتب شعر وخواطر بالعربى وساعات باسافر وساعات بلفلف لوحدى ف البلد لمجرد إنى أرجع البيت هلكانه وأنام
الأكلة المفضلة
أى حاجه من ايد جدتى ولو حتى بيض مقلى.. والنعمه هتهبلنى.. أهى دى اللى ينطبق عليها مقولة "الطبيخ نفس"
ومن ايد ميمايه (اللى هى ماما يعنى) باموت ف البيتسا والبغاشه (ودول طبعاً مابنشوفهمش غير م السنه للسنه).. وبرضه باحب الأصناف اللى غالباً ارتبطت بالعزومات كالمحشى ورق عنب والبفتيك والجلاش باللحمه المفرومه وسلطة البنجر وسلطة الزبادى كمان.. بس الله بقى على كشرى بعدس أصفر بالتحابيش بتاعته لما يكون واحشنى أو شوربة عدس وعيش محمر ف يوم برد زمهرير
من ايدى أنا بقى ..ههههه.. آل يعنى باطبخ
حلة فشار معمول صح ..بافكر أعمل مشروع عربية فشار على أول الشارع
حواوشى جبنه رومى.. قطايف.. وتصدقوا عملت مرة بسكوت أيام الثانوى.. كان واجب التدبير المنزلى.. بس مش عارفه ليه العيله داقته مرة وماتنوهاش وانا اللى كلته.. بس كان ظريف
الصفات التى ورثتها من أبى
الطول والملامح الحادة والدم الحامى والصراحة اللى تودى ف داهيه والصوت العالى ..تصدقوا ساعات باصدع من صوتى
الصفات التى ورثتها من أمى
يوه ماتعدش! ساعات باحس إنى كاربون كوبى منها.. طب هاقولك بعض الحاجات على سبيل المثال لا الحصر.. أولاً بالنسبه للشكل فناس كتير بتقول إنى شكلها بس أنا مش شايفه كده مش عارفه ليه (تصدقوا موضوع الشبه ده هيجننى.. باحب أسمع انطباعات الناس عنى .. ناس تقول كلى ماما وناس قالت إنى شكل أستاذى-احم هو عارف نفسه- وناس قالت بافكرهم بمنى زكى (ماتصدقوش! دى حنان زميلتى ف الشغل.. مجنونه!).. أما ألذ تعليق بقى سمعته فكان أول انطباع من رنا –دى أحدث زميله ليا ف الشغل- لما شافت صورة ليا قالتلى إنى شبه منال سلامه.. بجد مش قادره أمسك نفسى م الضحك من ساعتها!).. فماعلينا من موضوع الشكل ده لإن لو كده تبقى ماما شبه بوسى وانا فيا كتير من جينيفر لوبيز..بس اللى اتشربته فعلاً من أمى كان النظام وتحمل المسئولية وحب الناس والمجاملات الصادقة وإدمان الأدوات الكتابية والذوق الراقى والتلوين والرسم ... إلخ
أكثر ستة أشياء أكرهها
هيييييييه! هاتقمص دور سنفور الغضبان
أكره الحب من طرف واحد ..ولو انى ياما اتقندلت منه.. طب هو الواحد إزاى يضغط على نفسه ويقول لأ مش هاحب فلان الفلانى.. صعب أوى
أكره عزومات المراكبيه والمجاملات اللى هى تأدية واجب وعشان مايصحش وعيب ماتتعملش
أكره العالم السمّاويه الحقوديه اللى تقولك مبروك ولا ربنا معاك من تحت الضرس ويصاحبها شرر طالع من عينيهم ..ياساتر يارب! مفيش حاجه زرقا أما أعلقها! ياناس ياشر كفايه قر!وعضة أسد ولا نظرة حسد! والحلوه دى اسمها هبه
أكره أى حد فاتح دار إفتا مع نفسه ..من قال لا أعلم فقد أفتى والله! وأنا من أنصار اللى يدى العيش لخبازه ولو أكل تلاتربعه
أكره القعده مع شلة المعنسات عندنا ف الشغل ..مش باحب القصص اللى باين أوى إنها متفبركه.. نظام اتقدملى امبارح دكتور بس مش من مستوايا.. وأول امبارح وكيل نيابه بس تفيت ف وشه.. والعرسان كتير بس هى فين النفس.. وكذلك المتجوزات اللى مالهمش سيرة غير عيوب الجواز والحمل والخلفه.. نظام الحمل تاعبنى أوى.. وامبارح اتخانقت مع سى السيد وكنت هاسيبله البيت.. والواد حماده كان ولعه نار
أكره الزحمه والدوشه والحر والمجتمعات المخملية بالأوى ..الساحل الشمالى رحته مرة واحدة وسهرنا ف مارينا ليلة واحدة من باب العلم بالشئ بس أوعدكوا مش هاتتكرر.. وكمان المجتمعات البيئة أوى بس بيمثلوا إنهم راقيين ..نظام ترعرت ف بيت ببا.. وياى.. وعندك واحدة بس؟ أنا عندى تلاته
أكره الألقاب زى أبله وكابتن وأستاذه وأستاذ وباشمهندز وعم الحاج
أكره الأرقام والحسابات
أكره الأوامر والتسلط والديكتاتورية
سورى سرحت.. دول أكيد مش سته.. بس ده كل اللى جه على بالى دلوقتى وطبعاً فيه حاجات تانيه كتير
أكثر ستة أشياء أحبها
هممممممممممم.. باحب حاجات كتير أوى برضه.. بس هاقول اللى ييجى ف بالى ومش هاعد طلعوا كام
باحب أى حاجه خلقها ربنا ونادرة أو مش موجودة أساساً ف مصر.. يعنى على سبيل المثال خنفسة الليدى بيرد وزهرة التيوليب والياسمين الهندى وأبوقردان والدلافين والتلج والشلالات والجبال وقوس قزح والحرنكش والنبق والتوت والكريز والكيوى
باحب الموهوبين.. ف كتابة الشعر أو النثر وف الرسم و ف الغناء والتمثيل كمان
باحب أقول الشعر ف الحلوين والحلو أقوله ياحلو ف عيونه ..على رأى جاهين ف غنوة المريله الكحلى
باحب أنقد الناس اللى باحبها ..باقول العيوب والمميزات بصراحة ورزقى على الله
باحب مزيكا شغاله ف الخلفية ..اسمها ميوزاك بالمناسبة.. يعنى وانا قاعده ع الكمبيوتر معلقه أنا اليومين دول على ماندى موور وساعات أم كلثوم.. وف الأوضه معلقه على شريط سوما الجديد وشريط مى كساب بالتبادل
باحب الصدف والمفاجآت..بس مش المفاجآت اللى تجيب سكته قلبيه
باحب الهدايا..بس الحاجات اللى باحبها
باحب الحواديت ..بس مش من أى حد برضه
باحب يوم أقضيه مع صحابى من أوله لآخره
باحب ف الشغل الشاى من ايد أم نور وصباح الفل بتاعة وردة وطالب أو طالبة يسألونى ف حاجه وأفيدهم وساعات تشات مع بعض الزمايل
باحب ابتسامة بابا وفخره بيا ..معرفش على ايه.. واخد قلم كبير فيا! وباحب دعوة أمى ليا ورضاها عنى ..كفايه! بالدنيا ومافيها
باحب أصلى ف مسجد بحق وحقيق ..آخر مرة كانت صلاة الجمعة ف مسجد ف الحى الأفرنجى ببورسعيد.. قد ايه جميل ونضيف ومرتب.. تسمع صوت الإمام تتجسد قدامك الآيات.. تسجد.. السجاجيد مرشوشه مسك فتبقى مش عايز ترفع راسك.. نفسى أروحه تانى.. وعلى فكرة دعيتلكوا كلكوا يومها.. ربنا يتقبل
العمل بالنسبة لى
حلو إن السؤال ده جه ف الآخر.. عشان أتحجج وأقول تعبت! أنا مابحبش أتكلم كتير ع الشغل.. باتوتر.. بس ممالاشك فيه طبعاً إنى من خلاله باشوف صنوف م البشر وبانحس وباخشوشن وأكيد باكل عيش.. ولو إنه مش عيش فينو بس الحمدلله
الكمبيوتر والانترنت بالنسبة لى
بقى إدمان! ربنا يعافينا.. بس باحاول أقضى أطول وقت بره البيت عشان أقاوم إغراءهم
ملحوظة: الفيونكه دى مش جديده! عمرها سنة وشوية أيام.. جبتها من شقتى القديمه الكائنه بالياهو
هناك 17 تعليقًا:
هوووبه نوتى هنا
انا نقلت قبلك بشويه
انا طبعا علقت على البلوج ده زماااااااااااان لما اتنشر اول مره
------------------------------
بصى الاول ادخلى على
customize ----setting---------Show word verification for comments?
واختارى نو
عشان لما بتعميليه يس بيخلينا نكتب حوروف غبيه عشان ينشر التعليق
Typical egyptian girl.. but with all the power of youth and that energy that enables u to cick everywhere
nice to meet u my dear...we have lots of common things
so plz plzzzzz..i wanna see ur image
i really like ur blog ,the way u write , ur tone of writing , ur choices ,well , i like u anyway .hope we have a talk some day ,who knows we might b frienands ,then it will b my pleasure .sure i'm not complimenting u ,simly cuz i don't know u
بطوط! أيوه كده الله يكرمك
عرفنى ع العمال والصنايعية الكويسين.. قصدى قول لى الدنيا هنا ماشية إزاى..أظن تم عمل اللازم..أيوه عارفه أنا الحروف الغبيه المتلزقه ف بعض دى
Helium Atom (the crow lover)! nice to meet you too! you know wot
you can simply see me in all the itsy-bitsy stuff mentioned here..till we meet:)
btw, Poe wrote a nice poem entitled "The Raven"..am sure you'll love it
anonymous:thanx 4 the sweet words
but y anonymous?? I hate sunglasses:)
الرقيقة هبه
اولا مبروك شقتك الجديدة وربنا يعمرها بيكي يا رب
ثانيا اا جيت هنا علشان ارد علي تعليقاتك المؤثره جدا اللي سبتيها علي مدنة ليه يا بنفسج
انا بجد مبسوطه اوي انك اهتميتي تعليقي اصلا .. لكن للاسف انا لاسباب خاصه جدا هاضطر اسيب البستان و جايز جدا اعزل انا كمان بس الفرق اني هاروح حته ما يعرفهاش حد :)
واكتب بقه و اقول كل اللي في نفسي
كنتي سألتيني الاغنيه لمين؟ الاغنيهلمطربه سوريه جميله خالص اسمها مياده بسليس :)
و تحياتي ليكي و مبروك المدونه .. امليها بقه كلام حلو و حقيقي و حركات
حياة جدييييييييييييييييييدة
مش عارفة اقول تانى
بسمة
بجد نورتى.. وولا يهمك تعزلى.. تمشى.. تبعدى.. تروحى على جزيرة نائية هاوصلك برضه
أناجبت الكتاب خلاص.. والنهارده كنت حاضره السبوع..إزاى ماشفتنيش؟
أما بالنسبة بقى لاختيارك ميادة بسليس..فأحب أقولك إنه اختيار راقى بس حزين أوى.. عارفه! كان واحد بيوصف صوت على الحجار بإنه زى القطيفه فلو هاوصف صوت مياده هاقول إنه زى صوف الموهير.. جوليا بطرس صوتها ممكن يكون من نفس القماش بس داخل فيه فتله ملونه..مش كله إنديجو.. معرفش بقى الألوان شايفاها ف الكلمات ولا المزيكا..المهم إنه أكثر إبهاجاً
وعلى رأيها
شو حلو الزمان
يجمعنا ونقول
ماعاد فيه نسيان
بنلتقى ع طول
لا أنت توعدنى
ولا أنطر وحيده
تاتيجى تاخدنى
من طرقات بعيده :)
ايمى
بعد كده ابقى سيبى التعليق بالاسم وعنوان الصفحة.. أو يكفى تقولى كلمة السر.. ههههه
الف مبروك على البلوجر الجديد.أيه بس التفاؤل ده فى ردودك على الأسئلة. وهفضل برده من قرائك ان مكنش عندك مانع. ادينى عرفتك اكتر من خلاله.بس بجد ليه حق بابا يفخر بيكى زى ما قسم انجليزى فخور بيكى. مستنى اباهاتك الجديدة. جارك الثانى من على الشمال غرفة 433
أهلا نورتينا هنا كنت بقول أنا الوحيدة اللي شغالة على البلوج سبوت وال 360 بس دلوقتي بوبا معايا
وحشتيني موووت والفيونكة هتاكل منك حتة
نورتي يا بوبا يا جميلة
كنت بقول أنا لوحدي هناك وهنا بس لقيت ونيس
والفيونكة هتاكل منك حتة
الله أكبر يا عرب الله أكبر.. هبة صارت من البلوجر. الله أكبر! ايه الحلاوة دي"مش مجاملة أنا والله!".. بجد حبيت التاج اللي حاسة اني قريته قبل كده.. وكمان حبيت البيريه وقعدة الستات الخنيقة- مش عارفة ليه ماما بتقول لي يا مروة انتِ بس نجيب لك شوية ستات وتقعدوا ترغوا- ما تعرفش اني ما باحبش كده!.. ربنا يسعدك يا هوبة ويوقف لك ولاد الحلال ويريح بالك يا جميل.. وبالي كمان!.. منورة بلوجر..
صباح الورد :)
وحيد!
الله يبارك فيك يافندم.. وبص هنا "الفيونكات للجميع" على وزن "القراءة للجميع" كده.. يعنى بلاش موضوع اسمحيلى ابقى من قرائك وامضيلى ف الأوتوجراف.. مش معقوله كده! الناس ورايا ف كل حته! أروح فين بس؟
بجد حسيت بتفاؤل؟ هو ممكن تلاقى تاء وفاء وألف ولام.. بس فعلاً لقيت الواو المهموزه دى اللى بتكمل الكلمة؟ وليه مابيجيش على بالنا إن كلمة تفاؤل فيها الحرف ده وبالتالى ممكن نلعبها على بورد السكرابل؟؟ ليه دايماً بنحطها ف كلمات زى "شؤم" و "بؤس"؟؟؟ تفتكر ده له علاقة بالغرفة 433؟
&&&&&
روبى!
ميرسى ميرسى ميرسى.. تلاقيكى اضطريتى تعيدى الكومنت مش كده؟ أكيد تخيلتى إنه ماتسيفش.. بس الجميل بقى هنا إن فيه أوبشن بيسمحلك تنشرى التعليقات اللطيفة بس وتتجاهلى كل محاولات البشر ف الاستظراف.. أهو ده أوبشن من ضمن الأوبشنات العبقرية هنا! يا أوبشناتك يا بلوجر
&&&&&
مرمر!
يلا يا ستى! مش هاخلى ف نفسكو حاجه! عشان لما أموت تقولوا عمرها ماحرمتنا من فيونكاتها وطلتها وأنسها.. صرفتى الخمسه جنيه ولا لسه؟ هههههه
منورة يا فيونكتى
وكله كوم والعروسة البيبي دى كوم تانىىىى
انا عاوزة واحدة
تعرفى هنا البلوج انضف؟ حاسة ان الالوان هادية كدة والحاجة منظمة..فكرة حلوة برضه..
مستنيين البوستات الجامدة
xxxxx
ريهام!
دى هدية.. واللى أعرفه إن الهدية لا تهدى.. بس عليكى وعلى سمسمه.. وكل اللى أقدر أعمله هنا إنى أسمحلك تبصيلها كويس يمكن يعنى -مين عارف- البنت يطلع شعر محمر كده وأمورة.. باقترح تسميها وقتها فيونكه خضرا..أيوه اسم مركب
وحشانى على فكرة.. وأهم حاجه شادى يكون مبسوط.. أدينا بنكتب كومنتات لبعض أهو.. هننهب يعنى؟
العزيزة هية :
نهنىء أنفسنا يا فندم .. انك صرت من عائئلة البلوجرز .. شرفتينا هنا زي ما كنت مشرفاهم هناك!
بصراحة كده الواحد يقدر يتواصل معاكي براحته.
اولا مرة أقرأ التدوينة دي .. بجد .. تحفة .. وتستحق وسام الجمهورية من الطبقة الأولى ..
في انتظار المزيد من ابداعاتك اللي واثق انها كبيرة وملهاش حد.
حسام
مش كده؟ ناس كتير حسيت إنها متعذبه ومش عارفه تعلق هناك ع الياهو.. وأنت عارف بقى الجمهور عريض إزاى.. ويقابلونى ف الشارع وعلى طلب واحد إن أعمل صفحة ع البلوجر
وسام مرة واحدة! أنا مش باحب النياشين والأوسمة.. لو فيونكة الاستحقاق من الدرجة الأولى مفيش مانع!
مدونتك لذيذة جداً يا هبة شكلي كده هقراها كلها النهارده مش قادرة أقاوم خفة دمك
إرسال تعليق